Ny utstilling på Galleri Nyhus

LÅVEKUNST: På låven til Galleri Nyhus stiller Shahram Taksha, Elisabeth de Lunde og Eli Hovdenak ut i sommar. Det gjer også Gerd D. Svalastog.

LÅVEKUNST: På låven til Galleri Nyhus stiller Shahram Taksha, Elisabeth de Lunde og Eli Hovdenak ut i sommar. Det gjer også Gerd D. Svalastog. Foto:

Av
Artikkelen er over 10 år gammel

Fredag opnar årets sommarutstilling på Galleri Nyhus. Fire kunstnarar skal stille ut grafikk, keramikk og måleri.

DEL

Gallerist Halvor Nyhus meiner det er ein symbolikk i kunsten til utstillarane som går att, sjølv om det er ei variert utstilling publikum får sjå i låven på Nyhus gard i sommar.

- Symbolikken ser ein aller best i måleria til Eli Hovdenak. Ho har hatt mange utstillingar i Noreg og Europa, seier Nyhus.

SJIRAFF OG ELEFANT

Hovdenak som opphavleg kjem frå Porsgrunn er kjent for humørfylt grafikk og nyskapande symbolbruk. Ho er utdanna ved målelinene på Statenes håndverks- og kunstindustriskole og Statens kunstakademi. Nasjonalgalleriet og Norsk kulturråd har kjøpt kunsten hennar. I tillegg har ho hatt mange utsmykkingsoppdrag på skular, barnehagar og sjukehus.

- I bilda mine finn ein mellommennesklege relasjonar. Eg har mellom anna eit bilde av ein begeistra elefant og ein avvisande sjiraff, seier Hovdenak.

Ho likar å spele på kontakt og forståing, og set det opp mot motsetningane i kunsten sin.

- Eg likar også språklege misforståingar og blir glad når eg kan bruke det i bilda, seier Hovdenak, som no bur i Oslo.

MORO MED LANDSKAP

Elisabeth de Lunde stiller ut måleria sine for andre året på rad. Denne gongen har ho gått meir over til å måle landskap, og då gjerne Telemarks-landskap. De Lunde kjem frå Nome, men bur i København om dagen.

- I denne utstillinga fortel eg historier ved å bruke naturen. Eg sit i København og måler norske landskap, smiler de Lunde.

Ho synest det er friare å jobbe med natur enn menneske.

- Vatn er ein raud tråd gjennom utstillinga mi. Dessutan er det spor etter mystiske handlingar i landskapsmåleria, seier de Lunde.

Iranaren Shahram Taksha måler stilleben. Han tar utgangspunkt i heilt vanlege ting som ei vasskran på ein vegg.

Gerd Danbolt Svalastog, som har drive keramikkverkstad i Grungedal i Vinje sidan 1983 skal stille ut brukskunst av keramikk. Ho har hatt ei rekkje utstillingar her til lands, mellom anna fleire på Galleri Nyhus.

Galleriet arrangerer også konsert i Nes kyrkje med de Lundes make, operasangeren Jakob Christian Zethner. Han tar utgangspunkt i de Lundes kunst når han syng Bach, Mozart og Ravel 5. juli.

Artikkeltags