Musikken fekk utfalde seg fritt og velklingande i Rauland kyrkje sundag kveld. Silje Vige, Spelemannslaget Falkeriset og Rauland Musikkorps gledde eit ikkje altfor talrikt publikum med ein fint samansett adventskonsert.

Ute var det stormkast over Totak, men inne i kyrkja var det lunt og stemningsfullt då organist Tony Ralay innleidde med Bachs preludium og fuge i D.

Eit krevjande verk der det ikkje er nok med flinke fingrar, også fotarbeidet må vera i orden.

Det er ti år sidan Silje Vige gjorde suksess i Melodi Grand Prix med «Alle mine tankar». Seinare har mykje skjedd, men Silje har teke vel vare på sitt utvilsame musikalske talent.

KVEDAR OG VOKALIST

Etter å ha vald musikkvegen med blant anna to år på folkemusikkstudiet er ho nå attende på Rauland som masterstudent i folkemusikk under professor Vidar Lande.

Som folkemusikkstudent har ho sjølvsagt vore å høyre på Rauland i ulike samanhengar, men dette var første gong ho stod fram på ein open konsert.

Vige viste seg først fram som folketoneutøvar og song «Eit barn er født i Betlehem» på ein tone frå Bjerkreim. Seinare fekk ho mikrofon og song to songar saman med Rauland Musikkorps.

Det var ei glede å høyre henne både som kvedar og som vokalist - og Rauland Musikkorps, eit reint vaksenkorps, gav fulltonande og disiplinert tonefølgje.

FELE OG FLØYTE

Korpset hadde si eiga avdeling under dirigent Knut Mosand, og inviterte også til allsong i eit triveleg arrangement av Prøysens «Julekveldsvise».

Ingen adventskonsert utan bygdas eigne spelemenn. 50-årsjubilerande Falkeriset stilte berre fire mann sterke, men imponerte både med fint samspel og solo-slåttar.

Per Åsmund Omholt, folkemusikklærar og leiar i laget, er svært allsidig. Han spelar både fele og fløyte, og sundag kveld imponerte han dessutan som kvedar med ein salme etter Ragnar Vigdal.

Arne Øygarden framførte ein gangar etter Håvard Gibøen, mens Terje Chr. Hanssen spela Fykerud, før laget avslutta med signaturslåtten «Falkeriset».