Bygda med kring 70 innbyggjarar er i ferd med å skape sin eigen festival. 6.-8. august går den første av forhåpentlegvis fleire Bøgrend Autofestivalar av stabelen. Eit ivrig lokalsamfunn, initiativtakarar og bookingselskap med lokal tilknyting går med dette i brodden for å setje Bøgrend på kartet.

MANGE GODE TANKAR

Valkyrien Allstars, Aasmund Nordstoga og Amund og Henrik Maarud er blant musikarane ein kan oppleve i lokala plasserte få meter frå E 134, midtvegs mellom Åmot og Haukeli. Utflytta vinbyggje, inititivtakar og ansvarleg for bookingselskapet Havresekken Bukking, Asgaut Høgmo Bakken, seier at koplinga av tilfeldigheiter og gode tankar gjorde at ein valde å realisere det originale, men spenstige prosjektet.

- Eit ønskje om å arrangere konsert på Bøgrend Auto har fleire gonger vore reist. Og ryktet om at fleire i bygda også ønskte å arrangere ein venners-venners-fest fekk ballen til å rulle vidare til festivalnivå, fortel ein tydeleg spent Høgmo Bakken som samarbeider med Silje Hegg og bygdeprosjektet Liv i Vinje om tiltaket. Og at dei har fått tak i ettertrakta musikarar er det liten tvil om. Samme helg vil nemleg fleire av artistane på lista spele på Notodden Bluesfestival og andre store scener.

- Akkurat nå verkar det nesten litt vilt, men det er av enorm verdi for bygda og lokalsamfunnet, ikkje minst viss dette skulle funke, seier Høgmo Bakken, som trass i å vere busett i osloområdet i mange år, framleis har sterke kjensler for heimbygda.

HAVRESEKKEN BUKKING

Saman med ein anna vesttele, Eivind Kaasin, har dei to nyleg oppretta bookingselskapet Havresekken Bukking, som først og fremst arbeider etter ein viktig føremålsparagraf.

- Havresekken Bukking har som føremål å presentere musikk på stader der ein ikkje trudde ein skulle trivst, smiler Høgmo Bakken. Han seier at bookingselskapet sjeldan har vore så i tråd med føremålspragrafen som dei er i dette tilfellet.

- Bøgrend Auto er eit lokale som oppfyller dette kravet til fingerspissane, ler han, og syner til store suksessar i hovudstaden med denne rettesnora å forhalde seg til.

LOKAL TILKNYTING

Musikkonseptet sprikar elles breitt med omsyn til både sjanger og uttrykk. Men det lokale særpreget er godt i varetatt, både kva som gjeld åndeleg og fysisk næring. Og fleire vil debutere med eitt og anna her.

- Det blir første telemarkskonserten til Aasmund Nordstoga etter den siste plata. Elles debuterer vinbyggjen Erlend Kaasa med musikkprosjektet sitt Judas Booth, nemner Høgmo Bakken som to av fleire kuriositetar. For også på matfronten blir det nyskaping.

- Tradisjonsmatekspert Bodil Nordjore vil by på lokalprodusert mat, der hjorteburger frå Våmartveit vil vere ein av fleire spesialitetar, fortel ein oppglødd arrangør. Og det synest han ha god grunn til å gjere. For dei 600 billettane som er lagt ut for sal har alt fått gode bein å gå på.