Annbjørg Lien er jenta frå Mauseidvåg utanfor Ålesund som hadde farens bandopptekne folkemusikkhalvtimar som den første læremeisteren, som viste talent nok til å bli med på ein av landets første folkemusikkprosjekt for ungar, «Eg er liten eg», i 1983, og som gav ut den første solo-LP-en alt i 1988.

Ungjenta kom med i det unge norske folkemusikkmiljøet som medspelar i Bukkane Bruse, og som vaksen har ho orientert seg langt utanfor Noregs grenser, og vi har høyrd og sett henne som internasjonal artist i String Sisters.

GJEST I JONDALEN

- Hauk Buen er kanskje den hardingfelespelemannen eg har høyrt mest på og som eg hadde den store glede og ære av å få vera gjest hos, fortalde Annbjørg og opna Borgjakonserten med «Spelemannsprøva» og «Jolaftan», den siste ein springar etter Svein Løndal.

Det er ikkje alltid lett å vera dame i eit mannsdominert spelemannsmiljø, men det har vore til hjelp å ha denne fela, ungdomsfela etter den legendariske Kristiane Lund frå Bø, fortalde Annbjørg og gav til beste Kristianes versjon av «Fykeruds farvel til Amerika».

At ho også er ein framifrå utøvar på vanleg fele, viste ho med «Halling» av Olav Kjellstad, ein sunnmørsspelemann. Tilbake til hardingfela følgde ein klassikar blant lydarslåttane i Telemark – «Førnesbrunen» slik Olav Løndal spela slåtten.

INSPIRASJON I LUFTA

- Det fyk inspirasjon forbi heile tida . Her er to slåttar etter to spelemenn eg set svært høgt, sa Annbjørg og serverte først «Huldreslått» lært av Hallvard Bjørgum, og deretter «Olav Høljesen», ein uvanleg sprek telespringar som er signert Knut Buen. Etter at ho flytta til Kristiansand, har ho også funne fram til meir av musikken frå Agder– og Åmli-spelemannen Salve Austenå som har lært henne gangaren «Kjempe-Jo».

Mot slutten av konserten tok ho fram materiale frå bestillingsverket ho laga for Telemarkfestivalen i 2007, der ho stilte med utanlandske medspelarar og internasjonalt farga musikk. Meir av dette slaget kom i fleire nummer frå oldtime-tradisjonen.

Også den svenske nyckelharpa veit Annbjørg Lien å traktere. Og så kan ho altså syngje! Det demonstrerte ho til fulle i ei vise ho kan takke Kirsten Bråten Berg og Hallvard Bjørgum for. «Kom heim», heiter songen som vi har ein mistanke om blir å finne på cd-en som ho gir ut til hausten. På heimesida hennar har albumet fått den engelske tittelen «Come home».