For to år sidan sette Frikar festivalpublikumet i Bø i ekstase. I år blir det Snuff Grinders - det vil seie heimefavoritten Sigbjørn Rua frå Bolkesjø og kongepokalvinnar Ulf Arne Johannesen i lag med to break-dansarar og to utøvarar av den latinamerikanske kampsporten capoeira - som skal gi folk hakeslepp. Ved trommesettet Stig Værness og med fele Andreas Ljones.

LANG LISTE

Festivalsjef Annette Winkelmann og festivalsekretær Solfrid Nestegard Gjeldok reknar opp: Den folkekjære Knut Buen som festleiar og tonesetjar alt på opningsgallaen, Andreas Ljones' fandenivoldske el-fele til internasjonal akrobatikk, Vamp-fele, Valravns danske fele, Knut Hamre-fele til Jon Fosse-tekst, Håvard Gibøens draum går i oppfylling i form av ein konsert med seks av landets beste spelemenn på Gullbrings hovudscene, Valkyrien Allstars med tre temperamentsfulle feler og nytt stoff frå cd-en som kjem i august, solokonsert med felemakar og spelemann Ottar Kåsa - og altså den klassiske Borgja-konserten med Annbjørg Lien som eit velplassert punktum.

- Det er berre kvedarkonsertane som er utan felelåt, seier festivalleiinga - halvt forskrekka over fele-dominansen.

NORDISK ORFEUS

Men det manglar ikkje på avveksling: Mange ser med forventning fram til Runartromma, Øyonn Groven Myhrens bestillingsverk til festivalens 20-årsjubileum. Her vil Øyonns klokkeklare røyst og harpeklang sno seg mellom mystisk trommelyd frå trioen i SISU, Bjørn Skansen, Marius Søbye og Thomas Nilsson. Det er den nordiske versjonen av forteljinga om Orfeus og Eurydike vi får høyre, og denne gongen får Øyonn plass i storsalen!

VALRAVN VED MIDNATT

Midnattskonserten på Kvennøy med Valravn, fire danske musikarar og færøyisk volkalist, blir også ei visuell oppleving. Valravn er Danmarks svar på Gåte, men byr i tillegg både på flammedans og fyrverkeri. Ta med varme klede og lommelykt!

Blant ei rekkje spennande klubb- og intimkonsertar må nemnast kvedarmøtet mellom Marit Vågen Lilleland og Gunnlaug Lien Myhr, konsertane med britiske Eliza Carthy og skotske Julie Fowlis, og dessutan kan ungane gle seg til eigen barnekonsert på Gullbring og «barnival» på Kvennøya på avslutningsdagen.

Med eit slikt program - og dessutan eit par gratiskonsertar - er det kanskje ikkje rart at Telemarkfestivalen i år ikkje har fått plass til den tradisjonsrike Evjukonserten og heller ingen kyrkjekonsert.

- I fjor hadde vi kanskje for mange konsertar, og derfor fann vi å måtte stramme inn i år. Men kanskje blir det både Evju- og kyrkjekonsert att neste år, seier dei flittige kvinnene på festivalkontoret.