Torsdag startar Kartfestivalen på Gvarv for femte gong. Festivalen blir opna av poesislam for tredje året på rad. Det skjer på rampa mellom Kjernehuset og Kunstnerhuset. Dystklare poetar skal kjempe om ei NM-deltaking i Oslo til hausten. Det er Lenorardos øre som arrangerer skaldekampen i samarbeid med Kartfestivalen.

- For to år sidan var me dei fyrste i Telemark til å arrangere poesislam, seier festivalarrangør Øyvind Dahle.

PUBLIKUM KÅRAR VINNAR

Skriv du dikt, raptekstar, songtekstar, gåter, anekdotar, rim, limerick, regler, haikudikt, noveller, kåseri eller korte, korte romanar som varar i tre minutt? Då kan du ta med deg tre tekstar, gripe mikrofonen og gje alt for publikum. Det er nemleg dei som kårar vinnaren.

- Ideen bak poesislammen er å utfordre alle autoritetar som hevdar å vite kva som har litterær verdi, seier Heidi Christoffersen i Leonardos øre.

Poesislam er ei konkurranseform der mange ulike poetiske stilartar møtast. Det heile starta opp i Chicago i USA med Marc Kelly Smith i 1984.

- Han var ein bygningsarbeidar som skreiv dikt frå han var og ung. Smith ville demokratisere poesien ved å opne for alle, seier Christoffersen.

Poesislam er populært i USA, Europa og Asia. I Noreg har det mellom anna blitt arrangert poesislam i Porsgrunn.

- Men nokre av dei etablerte poetane ser på poesislam som forfall, fortel Christoffersen.

POESI, RADIO OG BLUES

I år er det Kristian Ihle Hanto som skal vere programleiar. Mellom poesislaga skal Trond Ytterbø frå Notodden Blues Band underhalde.

P3 kjem også til poesislammen. To radiostemmer skal delta. Det er Ludvig Løkholm Levin og Webjørn Svendsen Espeland som skal kjempe om publikums gunst. Sistnemnde er frå Bø.

- Publikum har ein meir aktiv rolle. Det blir latter og laussluppen stemning. Innleving har også mykje å seie, seier Dahle.

Han fortel at det brukar å vere god oppslutning med 12-14 deltakarar og mykje publikum.

- Folk har manna seg opp og blitt med, alt frå profilerte poetar til mindre kjente. Liv Holtskog frå Sauherad, Helge Rykja frå Kragerø og Reidar Ekrer frå Bø er blant dei som har delteke tidlegare, seier Dahle.

Jørn Berget frå Bø vann fyrste året og Arild Rekkedal frå Sauherad vann i fjor.

- Begge har delteke i poesislam-NM, seier Kart-arrangøren.

Men for å kome heilt til NM må årets vinnar på Gvarv innom regionsfinalen i Drammen.