For at diktverket frå 1866 framleis er høgst aktuelt, prova dei tre karane til fulle. Gjennom song, spel og opplesing vart historiene kring kjempa frå Edland, Storegut, formidla på ein særs levande, men også samtidsaktuell måte.

MUSIKALSK PERLE

Tolkinga dei tre har gjort av det klassiske litterære verket, rommar både alvor og latter, og må kunne karakteriserast som ei musikalsk perle av sjeldan vare. Tekstane er i seg sjølve spennande utgangspunkt, men gjennom dei tre musikalske meistrane, får desse for alvor kjøt og farge, med det romslege armslaget desse har gjeve til å utfalde dei særeigne kvalitetane sine. Odd Nordstoga, som ein stor melodiskapar, tekstformidlar og songar, Per Anders Buen Garnås, som ein framifrå spelemann, og Aasmund Nordstoga, som ein strålande opplesar, formidlar og humorist. Denne Storeguten rommar alt dette og meir til.

IMPONERANDE

For at ein fullstendig akustisk konsert, basert på nakne røyster, gitar- og felespel åleine klarar å trollbinde kring 400 publikumarar, er i seg sjølv ei stor bragd. At dei også gjer det med slik bravour, er ytterlegare imponerande. Dei frammøtte fekk glede av å møte song og spel av høg rang, solistisk så vel som i samspel. Og både spelemenn og tekstformidlarar leverte den eine perla etter den andre, så det gjekk kaldt nedover ryggane. Ein hadde faktisk ønskt at det aldri tok slutt. Dette samstundes som publikum fekk kjennskap til særeigne historier kring telemarkingen.

BYGDEHELT

Diktverket Storegut kom for første gong ut i 1866 og blir rekna som eit av dei største arbeida til Aasmund Olavson Vinje; eit klassisk verk i den norske bokheimen. Storegut er ein historisk person som levde i Øvre Telemark på slutten av 1700-talet. Og gjennom Vinje vart den kjempesterke Olav Edland også kjent langt utanfor lokalmiljøet.

Soga om han er dramatisk. Her finst døme på nevarretten (den sterkastes rett) som då rådde, her er skildring av korrupte embetsmenn, urettferdig handsaming av fattige, europeisk storkrig, kongemakt, romantikk og bygdeliv. Ein møter ein bygdehelt, som på grunn av styrken og rettferdssansen sin får både vener og fiendar, og såleis eit spesielt dramatisk liv. Og delar av dette vart publikum presenterte for på ein særs inspirerande måte i går.

PÅ RUNDTUR

Odd og Aasmund Nordstoga har gjort Storegut før. Først som skulekonsert for ungdomsskulen, seinare som kveldskonsertar. I samband med Litteraturdagane i Vinje i fjor, fekk dei med seg Per Anders Buen Garnås på hardingfele. Dette vart svært vellukka, og no har dei tre karane tatt med seg Storeguten på ei litt lengre reise rundt om i landet. Og den vitjinga er det all grunn til å få med seg.