- Det kjennest som å bli henta rett inn i Premier League og score mål i opningskampen, seier Jo Henning Kåsin og smiler praktisk talt frå øyre til øyre. For saman med tre av bandmedlemmene sine sit han med ei drømmekontrakt i handa, mange musikarar vil misunne.

BESTILLINGSVERK

Felles kjennskap i managementa til Come taste the band og Glenn Hughes, førte til eit eineståande musikkprosjekt under fjorårets Kartfestival på Gvarv. For saman med den legendariske Deep Purple-stjerna skulle dei fire musikarane Jo Henning Kåsin, Frode Flatland Jensen, Vidar Heldal og Eldar Melkvik vere band. Og erfaringane har gjeve rockeguruen meirsmak.

- Etter avslutta konsert i fjor, poengterte ein oppglødd Hughes at dette ville han gjere meir. Men ingen av oss hadde vel eigentleg trudd det kom til å bli noko, før musikaren berre ein månad etter konserten tok opp tråden att, fortel Kåsin, som sidan sommaren har vore delaktig i arbeidet med å snekre saman ei turnèliste.

- Responsen har vore enorm. Me kunne sikkert banka 30 konsertar utan problem, men det blir ein eksklusiv runde på seks, kanskje sju konsertar, godt spreidde utover heile landet, legg Kåsin til, og fortel at telemarkskonserten blir å sjå og høyre på Wrightegaarden i Langesund i juli. Store festivalar i Drammen, Kristiansund, Ørsta, Bergen og Skånevik står elles for tur.

GOD OPPVARMING

Og det blir eit noko anna fokus på gruppa, enn kva desse har vore vande med som musikarar. Come Taste the Band, som har turnert på langs og på tvers i landet i ein tiårsperiode, får no, med Hughes på laget, oppvarmingsband ein tidlegare sjeldan fekk sjansen til å varme opp.

- Det blir ei heilt ny verd for oss. På bluesfestivalen i Skånevik har me Hellbillies som oppvarming. I Drammen TNT, så ein kan seie ein føler seg ganske så overvelda, gliser Kåsin, som etter godt logistikkarbeid, endeleg kunne presentere ei komplett speleliste i går.

- Hughes sjølv har presisert at musikkarbeidet har gitt han litt ekstra piff. For med dette konseptet blømer dei gamle Purple-låtane, som har vore lite å høyre i levande live dei siste tiåra, skyt Heldal inn.

LEGENDESTATUS

I brodden for band som Deep Purple og Black Sabbath, har Glenn Hughes ry på seg for å vere ein av rockens største vokalistar. Medverkande til millionseljande album som «Burn» i 1974, har denne også for lengst opparbeidd legendestatus. Og dei siste åra har rockaren i hovudsak fokusert på eiga solokarriere. Det er difor ikkje heilt utan grunn at dei fire telemarkingane føler seg beæra i oppdraget som ligg føre.

- Det er tid for eit magisk og sjeldan gjenhøyr med «Burn», «Mistreated», «Stormbringer», «You keep om moving» og mange fleire, seier ein stolt trio, som går ein sommar i vente, dei sjeldan vil gløyme.