- Det har gått over all forventning, smiler ein samstemd duo og drivarar av Nærbutikken Åmotsdal, Tanja Sluijsmans og Vincent `t Hart. Dei er godt kjende med at situasjonen for lokalbutikken deira strir imot utviklinga elles i landet. Men innsatsen i bygda har vore formidabel for å gje butikken ei framtid, og på fredag vanka det marsipankake i store mengder for å feire bygd og butikk.

- Det har vore ein stor suksess, rett og slett, smiler ein av fleire nøgde pådrivar for butikken og styreleiar i Åmotsdal Næringsbygg, Roar Gjessing.

BRUKAR BUTIKKEN

Raude tal i rekneskapen over lengre tid har blitt ein trend ved mange lokalbutikkar dei siste åra, og for fleire av dei blir utgangen å avvikle. Nærbutikken Åmotsdal vil derimot gå godt over budsjett i år.

- Ein budsjetterte med 4,5 millionar kroner for 2010, men vil innan utgangen av året nå 5,5 millionar kroner, fortel Gjessing og seier at oppskrifta er enkel.

- Både bygdefolk og hyttefolk er flinke til å nytte seg av butikken, seier han og spår at bygda med kring 200 innbyggjarar vil ha nær tilgang til både brød og smør i mange år framover, noko mange mangla tru på.

MANGE NEGATIVE

For verken kreditorar eller småsamfunnsutviklarar var særleg positive til butikkprosjektet, som kom i kraft etter ein storstilt dugnadsinnsats.

- Me vart fortalde at skulle me etablere ein lokalbutikk i bygda, måtte denne vere på fote innan eit halvår etter at den førre valde å avvikle, fortel Gjessing, om butikkverksemda som sette kroken på døra grunna sjukdom ved påsketider 2007.

- Eg trur heller lokalsamfunnet for alvor fekk tid til å kjenne på kroppen korleis det føltest å vere utan lokalbutikk. For mange åmotsdølar innebar butikkfråveret 20 kilometer til næraste utsalsstad, fortel Gjessing om bygdefolket som i nærare tre år var utan denne lokale tenesta. Og gleda over å ha Nærbutikken Åmotsdal på plass, er ikkje Gjessing aleine om å ha.

MØTEST OFTARE

- Det er veldig godt å ha butikk att. Me er godt nøgde med det, slår Irene Aarbakk fast, som ein av fleire faste kundar. Ho understrekar også at butikken representerer langt meir enn varetilgangen.

- Det har alt å seie at det er butikk her. Det er meir liv i bygda og bygdefolket møtast oftare, seier ho om åmotsdølane som har fått tilbake samlingsstaden sin og som på ingen måte hadde ønskje om å halde fast på dei nye handlemønstera dei måtte leve med i åra utan butikk.

Det nybygde forretningslokalet er eigd av Åmotsdal Næringsselskap AS og har 80 aksjeeigarar, 40 fastbuande og 40 hyttefolk.

- Det er eigentleg heilt genialt. På den måten har ein sikra 80 familiar i kundekrinsen, smiler Gjessing.