Øystein Skori (35) har vore den aller ivrigaste forkjemparen for dugnadsprosjektet i fjellbygda og fekk æra av å bruke saksa på den raude snora.

Dermed kunne åmotsdølar i alle aldrar myldre inn i eit ljost, romsleg og fornuftig forretningsbygg. Eit rimeleg, men likevel tenleg bygg, sa Roar Gjessing, primus motor for Åmotsdal dagligvare, da han ønskte eit par hundreogfemti sambygdingar velkomne til opninga.

For å reise bygget til 2,5 millionar har bygdefolk teikna aksjar for 600000. Dugnadsinnsatsen er formidabel og verdt 700000. Gjessing takka dyktige handverksfirma for innsatsen. Verken snikkarar, rørleggjar eller elektrikar har tent seg rik på den nye nærbutikken, slo han fast.

FRÅ NEDERLAND TIL ÅMOTSDAL

Entusiasmen let seg også måle i talet på blomebukettar. Dei aller største og finaste gjekk til drivarparet - nederlandske Tanja Sluismans og Vincent 't Hart. Det sjarmerande ekteparet med vesle Dagmar på armen har alt vunne seg ein plass i hjarta til åmotsdølane. Han er handelsmann i fjerde generasjon, og begeistringa var stor da det viste seg at tredje generasjon, altså Vincents foreldre, hadde lagt feiringa av bryllaupsdagen sin til grendefesten i den norske fjellbygda.

DIKT OG VISER

Opningsseremonien baud også på rimsterkt dikt for dagen, skrive og framført av Halvor Dyrland. Randi Øverbø har folketonen i seg og song ei fin bygdevise på melodien til «Hurra for den som fyller sitt år». Sonen Jon Inge på seks går mor ein høg gang og song festleg og med diksjon som ein operasongar. Til slutt helsa Karl Valhovd frå bygdefolket og oppmoda kvar og ein til å gjera seg nytte av nærbutikken.

- Mens nærbutikkar blir lagt ned i fleng rundt om, er vi her i Åmotsdal freidige nok til å gå andre vegen. Nå ligg bui her som ein trassig protest. Lat oss gå saman om å gjera staden til ein god møteplass for heile bygdi, sa Valhovd.

Inne i det trivelege lokalet var det kaffe, brus og kaker til alle, og etter stemninga å døme går nybui i Åmotsdal travle dagar i møte.