Høge driftskostnader gjer at Vinje kommune må samlokalisere bustadar for funksjonshemma.

Administrasjonen har greidd ut fire tomter som ulike alternativ for omsorgsbustader i Vinje. Statkraft-tomta, Kårstein-tomta, Fristadsenteret og dagsentertomta blei velt ut. Sandernes-tomta blei raskt utelukka på grunn av liten terrasse og parkering.

- Samlokaliseringa har vore tema over fleire år. Økonomi, personale og det å bu fleire saman ligg til grunn, seier Baiba Sheine (SV), nestleiar i oppvekst- og velferdsutvalet (OVU).

FAVORITT I DAGSENTERET

- Om Vinje kommune skal utnytte dagsentertomta, så må ein rive dagsenteret og bygge det opp att. Dette er eit bra tilbod. 31,75 er kostnadsramma, seier Sheine, som la fram ynska til dei tilsette og pårørande.

Ho fortel at Kårstein-tomta er nummer to på lista til dei pårørande. Kårstein-tomta har ein kostnad på 34,6 millionar. Statskraft-tomta kjem på tredjeplass med 33 millionar. Fristadsenteret kjem på fjerdeplass med eldrebustader i to høgder.

- Pårørande ser ikkje dette som eit aktuelt alternativ fordi det ikkje ligg på bakkenivå, seier nestleiaren.

Dette alternativet er det billigaste og ligg på 30,8-32 millionar.

- Fagleg sett er Statkraft-tomta mest ideell, men OVU har kome fram til at Kårstein-tomta er best, seier Sheine.

BA OM Å IKKJE UTSETJE

Børre Rønningen (Ap) meiner det er hefta problem med alle alternativa.

- Eit nytt dagsenter vil koste fleirfaldige millionar. Grunneigar og festar på Kårstein-tomta vil frigjere tomta, sa Rønningen, som meiner Kårstein-tomta er beste alternativ.

Aslak Ofte (Sp) ville gjerne undersøke om Statkraft-tomta byggast ut, mellom anna mot Groven camping.

- Eg ber kommunestyret lande på ein avgjerdsle i dag, einingsleiar Alv Dag Brandal, som er einingsleiar i Vinje heimetenester, som helst såg at kommunestyret valde Statkraft-tomta.

Tor Strømme (Ap) var einig med Brandal om at saka ikkje kunne utsetjast lenger.

KÅRSTEIN-TOMTA

- Me må vurdere Kårstein og Fristad. Det einaste fornuftige er Fristad. Dei tilsette kan få ein mykje enklare situasjon alt i 2011, når Fristadsenteret står klart. Dei med rullestol vil gjerne bu i sentrum og ikkje i skogen, sa Halvor Lognvik (Frp).

- Me kan nok diskutere natt og dag og ikkje bli einige. Dei som jobbar i denne tenesta er konsekvent samde om Kårstein-tomta, sa Ole Kristian Nyhus (H).

Leiar i eldrerådet og Ap-politikar, Halvard Midtveit, minte om at tenesta gjekk med brakande underskot og at det var viktig å ta ei avgjersle for ikkje å tape endå fleire pengar.

Ofte og Sp trakk seg frå forslaget om utsetjing.

- No innser eg at Kårstein-tomta er god nok, sa Ofte til slutt.

Kårstein-tomta vann fram etter at forslaget til Halvor Lognvik om Fristadsenteret berre fekk to røyster.