Dei to siste dagane har LO-medlemmene i Telemark diskutert aktuelle problemstillingar under fylkeskonferansen på Straand hotell i Vrådal. Onsdag talte statsråd Dag Terje Andersen frå arbeids- og inkluderingsdepartementet om den norske modellen og finanskrisa. Nav-direktør Terje Tønnesen la fram situasjonen til Nav i Telemark, statssekretær Robin Kåss frå olje- og energidepartementet fortalde om energipolitikk i krisetider og Ivar Kristiansen informerte om Norsk folkehjelps arbeid. Då det skulle veljast kongresskandidatar gjekk mindretalsinnstillinga gjennom. Gunvor Strømme frå Vinje og Erik Hørsrud frå Grenland skal delta på LO-kongressen 11.-15. mai.

- Det er viktig at me frå LOs side er klare på sakene som våre medlemmer synest er viktige, seier LO-sekretær Trine Lise Sundnes, som i går forklarte om den faglege og politiske situasjonen for LO.

MANGE UTTALER

Til LO-kongressen i mai tar telemarkingane med seg ei rekke uttaler. Dei forventar at LO styrker innsatsen for dei som er støtt ut av arbeidslivet, at det er viktig å gjere skatteletta midlertidig og målretta mot utsette bedrifter. Dei vil ha ytterlegare tiltak innan permittering og tiltaksplassar, og ber regjeringa leggje til rette for rullerande permitteringar og større fleksibilitet. LO i Telemark krev at forslaget til stillingskutt ved lensmannskontor og politikammer opphøyrer og at talet på dagens polititenestemenn i fylket blir heldt oppe. I ei anna uttale står det at ingen lokalsjukehus skal leggast ned.

- Lokalsjukehusa skal ikkje gjerast om til distriktsmedisinske senter. Dei skal ha medisinske og kirurgiske akuttfunksjonar med tilhøyrande støttefunksjonar, står det i uttala.

KREV SIKRA FOLKETRYGD

LO i Telemark vil heller ikkje at statlege arbeidsplassar skal fjernast i distrikta. Dei vil at det skal stimulerast til vidareutvikling og nyskaping av statlege arbeidsplassar i distrikta. Eit anna felt som engasjerer LO-medlemmene frå vårt fylke er avtalefesta pensjon (AFP) og pensjonsformen i eit kvinneperspektiv.

- Me krev at regjeringa står for ein politikk som sikrar folketrygd og AFP-ordning som sikrast minst på dagens nivå og som ikkje fører til auka klasseskilje i Noreg, står det i uttala.

Organisasjonen krevj også at kommunane i Telemark straks sett i verk dei tiltak fylket har fått midlar til for å motvirke arbeidsløysa.

- Kommunane må krevje at firma som tildelast anbod har løns- og arbeidsforhold som er i samsvar med norsk lov og avtaleverk, står det i uttala.